ترة الدنيا صفت مو دنيا بعدك
حتة الخوان تخلو مني بعدك
انة من اذكر الغربة وطول الليل بعدك
ولله ابجي الغربة والعالم علية
صدر بصدر لاكاني ولامال
ولاعينه الجفت عني ولامال
ولاخلي ورث لبني ولامال
وضل طول العمر مجفي على الوطيه
وصخونه
يهل رايح لخونه وصي اخونه
كله ترا الوصخين كثرو وصخونه
طحت ما بين مرضين والصخونه
مرض صبري ومرض فركاك اليه
بسمه اتخبل من تنادي الناس بسمه كتبت الكلب والعمر بسمه يمحبوبي مو ضحكه ردت بسمه ليش الاحبه يخون بيه
يگلولي تنخه وگلت شرجي
وهواك اليوم صاير علي شرجي
اخبرك يا اخوي اليوم شر جاي
واضل ممنون لاهل العامريه
الف هنياله الضايگ لبنكم
ادز وارسل ضوه عيوني لبنكم
بنيت الگلب طابوكه لبنكم
وبعد هيهات تهدم عليه
لاحن
آنه جفوفي من فراكك ضيم لاحن
عجب كلبك علي ابد لا حن
صحيح اصبرت لكن اضل لاحين
اسامح بيك وانت تعيل بيه
عقلي ياترف حبـــــك وجن بيك
من الجوري يمحبوبي وجن بيك
إجيت انتوعـــــــــدك وجن بيك
ليالي الفرح وايــــــامي الزهيه
الك اجمل مسج ابعث ورقها
حبرها ادموعي وجروحي ورقها
يلمسبب سهر عيني وارقها
عزيز وشوفتك صعبت علية
للشاعر علي الخفاجي..
يدنية شفاد حربج..حاربينة
واضن حتى وكتنة..حار بينة
اثر جوية بدينة..حارة بينة
حرارة مو جمر جن نار بية
للشاعر الكبير علي الخفاجي..
تانيتك تمر بس ..مرة بينة
هواي ايام مرت..مرة بينة
مرة تصير بيكم..ومرة بينة
ومرة شصار لو نفرح سوية.
شوصفلك ثغر ولفي وعينه
نجم بسمماي صايرلي وعينه
حرت مابين افك كلبي وعينه
لو اذوب بهواه العمل بيه
قضيه اسمي على اسمك ماشخطنا
ازدحام احنى على دربك ماشي خطنه
شتظن من كد جمالك ما شخطنا
اليشوفك ينشخط ميه بالميه
ماي العذب مايك والمي انه
او تضل مو ولم غيري ولمي انه
انتكاسر بلمازح والميــــــــانه
اونخلط ماينه او مايك سويه
ابكد الموت احبنك وريدك
او عسى يسمر دخل دمي وريدك
حياتي او موتي يمدلل وريدك
تموت اتكلي اموت اوهاي هيه
وحك من انزل الصورة ورمها
انا علتي بالكلب زايد ورمها
اودها من وهي تحبي وراامها
بحضن امها وتدير العين الية
شليله الروح وتعالــج بسلهه
على الناذر كبل روحه بس الهه
نخيته ومن سمع صوتي بسلهه
ولا جن يوم وكلته من اديه
لعب بيةالزمان شلون ميمر
وجفة عني العزيز وبعد مامر
الحنضل جرعتة وكلت مو مر
المر فراكك يالغالي علية
حلو وياك كلبي صفه نيتة
يريد ايكون يمك صفه نيتة
شارعنة بجمالك صفنيتة
وطاح من الركن للركن بية
تخلبص غزل خوتك صفه كتلك
بوجه الكون نوكف صف كتلك
حبل غدرك جتفني وصف كتلك
ضلوعي الصفكن لا مو ادية
توهة العين طابتلة وقرتلة
وروحي اعترفت بحبة وقرتلة
ناس بلا بخت راحت وقرتلة
صار يخاف مني ويشك بية